ಬೆಂಗಳೂರು : ಕನ್ನಡದ ಜನಪ್ರಿಯ “ಜೀ ಕನ್ನಡ” ವಾಹಿನಿಯಲ್ಲಿ ಪ್ರಸಾರವಾಗಿದ್ದ ಕಾಮಿಡಿ ಕಿಲಾಡಿ ಕಾರ್ಯಕ್ರಮದ ಮೂಲಕ ಪ್ರೇಕ್ಷಕರ ಮನಸ್ಸು ಗೆದ್ದಿದ್ದ ನಟ ಮಡೆನೂರು ಮನು, ಈಗ ಗಂಭೀರ ಆರೋಪದ ಸವಾಲು ಎದುರಿಸುತ್ತಿದ್ದಾರೆ. ಮನು ಅವರನ್ನು ಸಹ ನಟಿಯೊಬ್ಬರ ಮೇಲಿನ ಅತ್ಯಾಚಾರ ಹಾಗೂ ಮೋಸದ ಆರೋಪದ ಹಿನ್ನೆಲೆಯಲ್ಲಿ ಅನ್ನಪೂರ್ಣೇಶ್ವರಿ ನಗರ ಪೊಲೀಸ್ ಠಾಣೆ ಪೊಲೀಸರು ಗುರುವಾರ ಸಂಜೆ ಬಂಧಿಸಿದ್ದಾರೆ.

ಪೊಲೀಸರು ನೀಡಿರುವ ಮಾಹಿತಿ ಪ್ರಕಾರ, ನಾಗರಬಾವಿಯಲ್ಲಿದ್ದ ತಮ್ಮ ನಿವಾಸದಿಂದ ಮನು ಅವರನ್ನು ವಶಕ್ಕೆ ತೆಗೆದುಕೊಂಡು ವಿಚಾರಣೆ ನಡೆಸಲಾಗಿದೆ. ನಂತರ ಮನು ವಿರುದ್ಧ ಸಾಬೀತಾದ ಪ್ರಾಥಮಿಕ ಸಾಕ್ಷಾಧಾರಗಳ ಆಧಾರದ ಮೇಲೆ ಬಂಧನ ಮಾಡಲಾಗಿದೆ. ಮನು ನಾಯಕ ನಟನಾಗಿ ಅಭಿನಯಿಸುವ ಸಿನಿಮಾ ‘ಕುಲದಲ್ಲಿ ಕೀಳ್ಯಾವುದೋ’ ಮಾರ್ಚ್ 23 ರಂದು ತೆರೆಕಾಣಲಿದೆ.

ಪೀಡಿತ ನಟಿಯ ಪ್ರಕಾರ, 2018ರಲ್ಲಿ ಕಾಮಿಡಿ ಕಿಲಾಡಿ ಕಾರ್ಯಕ್ರಮದ ವೇಳೆಯಲ್ಲೇ ಮನು ಅವರೊಂದಿಗೆ ಪರಿಚಯ ಆರಂಭವಾಗಿದೆ. ಸ್ನೇಹವನ್ನು ಪ್ರೀತಿಯನ್ನಾಗಿ ವಿಸ್ತರಿಸಿ, ಮನು ಅವರೇ ಮದುವೆಯಂತೆ ಕೇಳಿಕೊಂಡಿದ್ದಾರೆ. ಅಲ್ಲದೆ, ಅವರು ಈಗಾಗಲೇ ವಿವಾಹಿತರಾಗಿದ್ದು, ಮಕ್ಕಳೂ ಇದ್ದರೂ, ನಟಿಯ ಭಾವನೆಗಳನ್ನೂ, ಭವಿಷ್ಯವನ್ನೂ ನಿರ್ಲಕ್ಷಿಸಿದ್ದಾರೆ ಎಂದು ದೂರಿನಲ್ಲಿ ಉಲ್ಲೇಖವಾಗಿದೆ.

2022ರ ನವೆಂಬರ್ 29ರಂದು ಶಿಕಾರಿಪುರದಲ್ಲಿ ನಡೆದ ಹಾಸ್ಯ ಕಾರ್ಯಕ್ರಮಕ್ಕೆ ಮನು ನಟಿಯನ್ನ ಕರೆದುಕೊಂಡು ಹೋಗಿ, ಕಾರ್ಯಕ್ರಮದ ಬಳಿಕ ಹೋಟೆಲ್‌ಗೆ ಕರೆದುಕೊಂಡು ಹೋಗಿ ಸಂಭಾವನೆ ನೀಡುವ ನೆಪದಲ್ಲಿ ಅತ್ಯಾಚಾರ ಎಸಗಿದ್ದಾರೆ ಎಂದು ಆರೋಪಿಸಲಾಗಿದೆ.

ಇದೇ ನಾಟಕ ಮತ್ತೆ ಡಿಸೆಂಬರ್ 3ರಂದು ಮನು ಅವರೇ ನಟಿಯ ಮನೆಗೆ ಬಂದು ಮದುವೆಯಂತೆ ತಾಳಿ ಕಟ್ಟಿದ್ದು, ಬಳಿಕ ಎಲ್ಲವನ್ನೂ ಸುಳ್ಳು ಎಂದು ತಿರಸ್ಕರಿಸಿದ್ದಾರೆ. ನಟಿ ಈ ನಡುವೆ ಎರಡು ಬಾರಿ ಗರ್ಭವತಿಯಾದರೂ, ಮನು ಅವರೇ ಔಷಧ ನೀಡಿ ಗರ್ಭಪಾತಕ್ಕೆ ಕಾರಣರಾಗಿದ್ದಾರೆ ಎಂದು ಭಾರೀ ಆರೋಪವಿದೆ.

ಮತ್ತೊಂದೆಡೆ, ನಟಿ ಒಟ್ಟಿಗೆ ಜೀವನ ಸಾಗಿಸಲು ಮನವಿ ಮಾಡಿದಾಗ, ಮನು ಅವರು ಖಾಸಗಿ ವಿಡಿಯೋಗಳನ್ನು ಶೂಟ್ ಮಾಡಿ, ಭಯ ಹುಟ್ಟಿಸಿ, ಹಲ್ಲೆ ಮಾಡಿ ಬೆದರಿಕೆ ಹಾಕಿದ್ದಾರೆ ಎನ್ನಲಾಗಿದೆ. ಜೊತೆಗೆ, ನಟಿ ತನ್ನ ಖಾಸಗಿ ಹಣವನ್ನು ಬಳಸಿಕೊಂಡು ಲಕ್ಷಾಂತರ ರೂಪಾಯಿಗಳನ್ನು ಮನುಗೆ ನೀಡಿದ್ದರೂ, ಅವರು ಮೋಸಮಾಡಿದ್ದಾರೆ ಎಂದು ದೂರಿನಲ್ಲಿ ವಿವರಿಸಲಾಗಿದೆ.

ಪೋಲೀಸರು ಪ್ರಕರಣವನ್ನು ಗಂಭೀರವಾಗಿ ತೆಗೆದುಕೊಂಡಿದ್ದು, ಮನು ಅವರನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಗುವುದು ಎಂದು ತಿಳಿಸಿದ್ದಾರೆ. ಈಗಾಗಲೇ ಸಾಕ್ಷ್ಯಾಧಾರ ಸಂಗ್ರಹ ಪ್ರಕ್ರಿಯೆ ತೀವ್ರಗೊಂಡಿದ್ದು, ನಟಿಯ ವೈದ್ಯಕೀಯ ಪರೀಕ್ಷೆಯೂ ನೆರವೇರಿಸಲಾಗಿದೆ ಎನ್ನಲಾಗಿದೆ