ಒಂದು ಕಡೆ ಆಕಾಶಕ್ಕೇರುತ್ತಿರುವ ಬೆಲೆ, ಇನ್ನೊಂದು ಕಡೆ ಮದುವೆ ಮತ್ತು ಇನ್ನಿತರ ಶುಭ ಸಮಾರಂಭಗಳ ಸೀಸನ್. ಭಾರತದಲ್ಲಿ ಚಿನ್ನದ ಹಸಿವು ಎಂಬುದು ಎಂದಿಗೂ ತಣಿಯದ ದಾಹ. ಆದರೆ, ನಮ್ಮ ದೇಶದಲ್ಲಿ ಚಿನ್ನದ ಉತ್ಪಾದನೆ ಅಕ್ಷರಶಃ ಶೂನ್ಯಕ್ಕೆ ಹತ್ತಿರವಿದ್ದರೂ, ಪ್ರತಿ ವರ್ಷ ನಾವು 900 ಟನ್ ಚಿನ್ನವನ್ನು ಎಲ್ಲಿಂದ ತರುತ್ತೇವೆ? ಇದು ಭಾರತದ ಆರ್ಥಿಕತೆಯ ಮೇಲೆ ಬೀರುವ ಪರಿಣಾಮವೇನು? ಇಲ್ಲಿದೆ ಒಂದು ವಿಶ್ಲೇಷಣೆ.

ನಮ್ಮ ಕರಾವಳಿ ಭಾಗ ಮತ್ತು ಕನ್ನಡಿಗರಲ್ಲಿ ಒಂದು ಮಾತು ಕೇಳಿರುತ್ತೀರಿ - "ಮನೆಯಲ್ಲಿ ಹೆಣ್ಣು ಮಗುವಿದ್ದರೆ ಅಥವಾ ಮುಂದೆ ಶುಭ ಕಾರ್ಯಗಳಿದ್ದರೆ ಈಗಲೇ ಒಂದು ತೊಲ ಚಿನ್ನ ತಂದಿಟ್ಟುಬಿಡು" ಅಂತ. ಮದುವೆ ಇರಲಿ, ಹಬ್ಬ ಇರಲಿ ಅಥವಾ ಕಷ್ಟದ ಸಮಯವಿರಲಿ, ನಮಗೆ ಮೊದಲು ನೆನಪಾಗುವುದೇ ಚಿನ್ನ (Gold).

ಆದರೆ, ನೀವೆಂದಾದರೂ ಯೋಚಿಸಿದ್ದೀರಾ? ಭಾರತದಲ್ಲಿ ಚಿನ್ನದ ಗಣಿಗಳೇ ಇಲ್ಲದಿದ್ದರೂ, ನಾವೇಕೆ ಇಷ್ಟೊಂದು ಚಿನ್ನ ಖರೀದಿಸುತ್ತೇವೆ? ಈ ಚಿನ್ನವೆಲ್ಲ ಎಲ್ಲಿಂದ ಬರುತ್ತೆ? ಇದನ್ನು ತಿಳಿದರೆ ನೀವು ನಿಜಕ್ಕೂ ಆಶ್ಚರ್ಯ ಪಡುತ್ತೀರಿ!

ಬಳಸುವುದರಲ್ಲಿ ನಾವು ನಂಬರ್ 1, ಆದ್ರೆ ತೆಗೆಯುವುದರಲ್ಲಿ ಶೂನ್ಯ!
ಭಾರತಕ್ಕೆ ವರ್ಷಕ್ಕೆ ಸುಮಾರು 700 ರಿಂದ 900 ಟನ್ ಚಿನ್ನ ಬೇಕು. ಆದರೆ ನಮಗೆ ನಮ್ಮ ನೆಲದಲ್ಲಿ ಸಿಗುವುದು ಕೇವಲ 1% ಕ್ಕಿಂತ ಕಡಿಮೆ! ನಮ್ಮ ಕರ್ನಾಟಕದ 'ಹಟ್ಟಿ' ಗಣಿಯಿಂದ ಸ್ವಲ್ಪ ಸಿಗುತ್ತದೆಯಾದರೂ, ಅದು ನಮ್ಮ ಹಸಿವಿಗೆ ಸಾಕಾಗುವುದಿಲ್ಲ. ಅಂದರೆ, ನಾವು ಬಳಸುವ 90% ಕ್ಕಿಂತ ಹೆಚ್ಚು ಚಿನ್ನ ವಿದೇಶದಿಂದಲೇ ಬರಬೇಕು.

ಸ್ವಿಜರ್ಲ್ಯಾಂಡ್ ಎಂಬ ಮಾಯಾಲೋಕ!
ನಿಮಗೆ ಗೊತ್ತಾ? ನಾವು ಆಮದು ಮಾಡಿಕೊಳ್ಳುವ ಚಿನ್ನದಲ್ಲಿ ಸುಮಾರು ಶೇ. 40 ರಷ್ಟು ಚಿನ್ನ ಬರುವುದು ಸ್ವಿಜರ್ಲ್ಯಾಂಡ್‌ನಿಂದ! ಅಚ್ಚರಿಯ ವಿಷಯವೆಂದರೆ, ಆ ದೇಶದಲ್ಲಿ ಒಂದೇ ಒಂದು ಚಿನ್ನದ ಗಣಿಯೂ ಇಲ್ಲ! ಅವರು ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾದಿಂದ ಕಚ್ಚಾ ಚಿನ್ನವನ್ನು ತಂದು, ಅದನ್ನ ಶುದ್ಧೀಕರಿಸಿ (Refining) ನಮಗೆ ಆಭರಣದ ರೂಪದಲ್ಲಿ ಅಥವಾ ಬಿಸ್ಕೆಟ್ ರೂಪದಲ್ಲಿ ಮಾರುತ್ತಾರೆ.

ಹಣ ಎಲ್ಲಿಗೆ ಹೋಗುತ್ತಿದೆ?
ನಾವು ವರ್ಷಕ್ಕೆ ಸುಮಾರು 50 ಬಿಲಿಯನ್ ಡಾಲರ್ (ಲಕ್ಷಾಂತರ ಕೋಟಿ ರೂಪಾಯಿ) ಹಣವನ್ನು ಈ ಚಿನ್ನಕ್ಕಾಗಿ ವಿದೇಶಕ್ಕೆ ನೀಡುತ್ತಿದ್ದೇವೆ. ಇದರಿಂದ ನಮ್ಮ ದೇಶದ ಹಣದ ಮೌಲ್ಯದ ಮೇಲೆ ಪರಿಣಾಮ ಬೀರುತ್ತದೆ. ಅಂದರೆ, ನಾವು ಎಷ್ಟು ಹೆಚ್ಚು ಚಿನ್ನ ಖರೀದಿಸುತ್ತೇವೋ, ಅಷ್ಟು ಹೆಚ್ಚು ಭಾರತದ ಹಣ ವಿದೇಶಕ್ಕೆ ಹರಿಯುತ್ತದೆ.

ಹಳೆಯ ಚಿನ್ನದ ಕಥೆ ಏನು?
ನಮ್ಮಲ್ಲಿರುವ ಇನ್ನೊಂದು ಅಭ್ಯಾಸವೆಂದರೆ 'ಹಳೆಯ ಚಿನ್ನ ನೀಡಿ ಹೊಸದು ಮಾಡಿಸುವುದು'. ಭಾರತದ ಒಟ್ಟು ಬೇಡಿಕೆಯಲ್ಲಿ ಶೇ. 10-15 ರಷ್ಟು ಹೀಗೆ ಮರುಬಳಕೆಯ ಮೂಲಕವೇ ಪೂರೈಕೆಯಾಗುತ್ತದೆ. ಇದು ನಮ್ಮ ಆರ್ಥಿಕತೆಗೆ ಸ್ವಲ್ಪ ಮಟ್ಟಿಗೆ ಸಹಾಯ ಮಾಡುತ್ತದೆ.

ಈಗಿನ ಟ್ರೆಂಡ್ ಏನು?
ಬರೀ ಆಭರಣ ತಂದು ಲಾಕರ್‌ನಲ್ಲಿ ಇಡುವ ಕಾಲ ಈಗ ನಿಧಾನವಾಗಿ ಬದಲಾಗುತ್ತಿದೆ. SGB (ಚಿನ್ನದ ಬಾಂಡ್‌ಗಳು) ಅಂದರೆ ಚಿನ್ನವನ್ನು ಕಾಗದದ ರೂಪದಲ್ಲಿ ಇಟ್ಟುಕೊಳ್ಳುವುದು. ಇದಕ್ಕೆ ಕಳ್ಳರ ಭಯವೂ ಇಲ್ಲ, ಮೇಲೆ ವರ್ಷಕ್ಕೆ 2.5% ಬಡ್ಡಿಯೂ ಸಿಗುತ್ತದೆ!. ಮತ್ತೊಂದು ಡಿಜಿಟಲ್ ಗೋಲ್ಡ್(Digital Gold), ಫೋನ್ ಮೂಲಕವೇ ಒಂದು ರೂಪಾಯಿಗೂ ಚಿನ್ನ ಖರೀದಿಸುವ ಕಾಲ ಇದು.

ಚಿನ್ನದ ಬೆಲೆ ಎಷ್ಟೇ ಏರಲಿ, ನಮ್ಮ ಭಾರತೀಯರ, ಅದರಲ್ಲೂ ಕನ್ನಡಿಗರ 'ಚಿನ್ನದ ಪ್ರೀತಿ' ಮಾತ್ರ ಕಡಿಮೆ ಆಗಲ್ಲ. ಆದರೆ, ಹೂಡಿಕೆ ಮಾಡುವಾಗ ಸ್ವಲ್ಪ ಸ್ಮಾರ್ಟ್ ಆಗಿ ಯೋಚಿಸಿದರೆ ಲಾಭ ನಮ್ಮದೇ ಅಲ್ವಾ? ಭೌತಿಕ ಚಿನ್ನಕ್ಕಿಂತ ಡಿಜಿಟಲ್ ಅಥವಾ ಬಾಂಡ್ ರೂಪದ ಚಿನ್ನವು ಇಂದಿನ ದಿನಗಳಲ್ಲಿ ಹೆಚ್ಚು ಲಾಭದಾಯಕ ಎಂದು ತಜ್ಞರು ಅಭಿಪ್ರಾಯಪಡುತ್ತಾರೆ. ಸುಧಾವಾಣಿಯ ಓದುಗರು ತಮ್ಮ ಹೂಡಿಕೆಯ ನಿರ್ಧಾರಗಳನ್ನು ಸಮರ್ಪಕವಾಗಿ ತೆಗೆದುಕೊಳ್ಳುವುದು ಅಗತ್ಯ.