ಸದ್ಗುರು ಎಂದರೆ ಯಾರು ತಿಳಿದಿಲ್ಲ? ಅವರು ಇಂದು ಜಗತ್ತಿನಾದ್ಯಂತ ಲಕ್ಷಾಂತರ ಅನುಯಾಯಿಗಳನ್ನು ಹೊಂದಿರುವ ಆಧ್ಯಾತ್ಮಿಕ ಗುರು. ಆದರೆ ಸದ್ಗುರು ಮತ್ತು ಮಂಗಳೂರಿನ ನಡುವಿನ ಆಪ್ತ ಸಂಬಂಧ ಎಲ್ಲರಿಗೂ ತಿಳಿದಿಲ್ಲ. ತಮ್ಮ ಆರಂಭಿಕ ದಿನಗಳಲ್ಲಿ ಸದ್ಗುರು ಅವರು ಮಂಗಳೂರಿಗೆ ಅನೇಕ ಬಾರಿ ಭೇಟಿ ನೀಡಿ ಇಲ್ಲಿ ಯೋಗ ಶಿಬಿರಗಳನ್ನು ನಡೆಸುತ್ತಿದ್ದರು.

ಆ ದಿನಗಳಲ್ಲಿ ಅವರು ತಮ್ಮ ಸ್ನೇಹಿತರೊಂದಿಗೆ ಟ್ರೆಕ್ಕಿಂಗ್‌ ಮಾಡುವುದು, ಕಡಲ ತೀರದಲ್ಲಿ ಸಮಯ ಕಳೆಯುವುದು ಸೇರಿದಂತೆ ಸರಳ ಜೀವನವನ್ನು ಆನಂದಿಸುತ್ತಿದ್ದರು. ಈ ಎಲ್ಲ ನೆನಪುಗಳನ್ನು ಇತ್ತೀಚೆಗೆ ಮಂಗಳೂರಿನಲ್ಲಿ ವಾಸವಾಗಿರುವ ಅವರ ಹಳೆಯ ಸ್ನೇಹಿತ ಉಲ್ಲಾಸ್ ನಂಬಿಯಾರ್ ಅವರು ಹಂಚಿಕೊಂಡಿದ್ದಾರೆ.

ಉಲ್ಲಾಸ್ ನಂಬಿಯಾರ್ ಅವರು ‘ಹೋಮ್ ಆಫ್ ಇಷಾ ಇಂಗ್ಲಿಷ್’ ಎಂಬ ಯೂಟ್ಯೂಬ್ ಚಾನೆಲ್‌ಗೆ ನೀಡಿದ ಸಂದರ್ಶನದಲ್ಲಿ ಸದ್ಗುರು ಅವರೊಂದಿಗಿನ ತಮ್ಮ ಪ್ರಾರಂಭಿಕ ದಿನಗಳ ಅನುಭವಗಳನ್ನು ವಿವರಿಸಿದ್ದಾರೆ. ಸದ್ಗುರು ಅವರ ಕುಟುಂಬದ ಜೊತೆ ಕಳೆದ ಕ್ಷಣಗಳು ಸೇರಿದಂತೆ ಹಲವು ನೆನಪುಗಳನ್ನು ಅವರು ಹಂಚಿಕೊಂಡಿದ್ದಾರೆ. ಈ ಸಂದರ್ಶನದಲ್ಲಿ ಅವರು ಹೇಳಿದ ಒಂದು ಘಟನೆ ಸದ್ಗುರು ಅವರ ಅದ್ಭುತ ನಿಷ್ಠೆ ಮತ್ತು ಸಮರ್ಪಣೆಯನ್ನು ಸ್ಪಷ್ಟವಾಗಿ ತೋರಿಸುತ್ತದೆ.

ಉಲ್ಲಾಸ್ ಅವರ ಹೇಳಿಕೆಯಂತೆ, ಸದ್ಗುರು ಅವರು ಮಂಗಳೂರಿನಲ್ಲಿ ಯೋಗ ತರಗತಿ ನಡೆಸುತ್ತಿದ್ದ ಸಮಯದಲ್ಲಿ, ಕಾಸರಗೋಡು ಸಮೀಪದ ಕುಂಬ್ಳೆ ಎಂಬ ಊರಿನಿಂದ (ಮಂಗಳೂರಿನಿಂದ ಸುಮಾರು 32 ಕಿಲೋಮೀಟರ್ ದೂರ) ಒಬ್ಬ ವಿದ್ಯಾರ್ಥಿ ಸಂಜೆ 6ರಿಂದ 9 ಗಂಟೆಯವರೆಗೆ ನಡೆಯುವ ಯೋಗ ತರಗತಿಗೆ ನಿಯಮಿತವಾಗಿ ಬರುತ್ತಿದ್ದ.

ತರಗತಿಯ ನಂತರ ಸಾಮಾನ್ಯವಾಗಿ ಪ್ರಶ್ನೋತ್ತರ ಸತ್ರ ನಡೆಯುತ್ತಿತ್ತು. ಆ ದಿನಗಳಲ್ಲಿ ಮಂಗಳೂರಿನಿಂದ ಕುಂಬ್ಳೆಗೆ ಹೋಗುವ ಬಸ್ ಸೌಲಭ್ಯಗಳು ಅತ್ಯಂತ ಸೀಮಿತವಾಗಿದ್ದವು. ಇಂದಿನಂತೆ ರಾತ್ರಿ ತಡವಾದರೂ ವಾಹನ ಸಂಚಾರ ಇರಲಿಲ್ಲ. ಕೊನೆಯ ಬಸ್ ರಾತ್ರಿ ಸುಮಾರು 9:30ಕ್ಕೆ ಹೊರಡುತ್ತಿತ್ತು. ಒಂದು-ಎರಡು ಬಾರಿ ಆ ವಿದ್ಯಾರ್ಥಿ ಬಸ್ ಮಿಸ್ ಮಾಡಿಕೊಂಡ ಸಂದರ್ಭವೂ ಉಂಟಾಯಿತು.

ಆ ಬಳಿಕ ಮನೆಗೆ ಮರಳಲು ಯಾವುದೇ ಸಾರಿಗೆ ಸೌಲಭ್ಯ ಇರಲಿಲ್ಲ. ಇಂತಹ ಸಂದರ್ಭಗಳಲ್ಲಿ ಸದ್ಗುರು ಅವರು ತಾವೇ ಆ ವಿದ್ಯಾರ್ಥಿಯನ್ನು ತಮ್ಮ ವಾಹನದಲ್ಲಿ ಕುಂಬ್ಳೆಯಲ್ಲಿರುವ ಮನೆಗೆ ಕರೆದುಕೊಂಡು ಹೋಗುತ್ತಿದ್ದರು ಎಂಬುದು ಅಚ್ಚರಿಯ ಸಂಗತಿ. ಒಂದು ಕಡೆ ಪ್ರಯಾಣಕ್ಕೆ ಸುಮಾರು 1 ಗಂಟೆ 30 ನಿಮಿಷ, ಮತ್ತೆ ಮಂಗಳೂರಿಗೆ ಹಿಂದಿರುಗಲು ಮತ್ತೊಮ್ಮೆ 1 ಗಂಟೆ 30 ನಿಮಿಷ, ಅಂದರೆ ಒಟ್ಟು ಸುಮಾರು 3 ಗಂಟೆ ಅಥವಾ ಅದಕ್ಕಿಂತ ಹೆಚ್ಚು ಸಮಯ ಬೇಕಾಗುತ್ತಿತ್ತು. ಆ ದಿನಗಳಲ್ಲಿ ರಸ್ತೆಗಳು ಹದಗೆಟ್ಟ ಸ್ಥಿತಿಯಲ್ಲಿದ್ದು, ಗುಂಡಿಗಳು ತುಂಬಿದ್ದವು. ಆದರೂ ಸದ್ಗುರು ಅವರ ಸಮರ್ಪಣೆಯಲ್ಲಿ ಯಾವುದೇ ಕಡಿಮೆಯಿರಲಿಲ್ಲ ಎಂದು ಉಲ್ಲಾಸ್ ನೆನಪಿಸಿಕೊಂಡಿದ್ದಾರೆ.

ಈ ಎಲ್ಲದಕ್ಕೂ ಬಳಿಕ ಸದ್ಗುರು ಅವರು ರಾತ್ರಿ 11:30 ಅಥವಾ ಅದಕ್ಕಿಂತ ತಡವಾಗಿ ತಮ್ಮ ವಾಸ್ತವ್ಯ ಸ್ಥಳಕ್ಕೆ ತಲುಪುತ್ತಿದ್ದರು. ಸ್ವಲ್ಪ ವಿಶ್ರಾಂತಿ ಪಡೆದು ತಡರಾತ್ರಿಯಲ್ಲಿ ನಿದ್ರೆಗೆ ಜಾರುತ್ತಿದ್ದರು. ಆದರೆ ಮತ್ತೆ ಬೆಳಿಗ್ಗೆ 4 ಗಂಟೆಗೆ ಎದ್ದು, 6 ಗಂಟೆಯ ಯೋಗ ತರಗತಿಗೆ ಸಿದ್ಧರಾಗಬೇಕಾಗುತ್ತಿತ್ತು.

ಯಾವುದೇ ಕಾರಣಕ್ಕೂ ತಮ್ಮ ಶಿಷ್ಯರು ತರಗತಿಯನ್ನು ತಪ್ಪಿಸಿಕೊಳ್ಳಬಾರದು ಎಂಬುದು ಸದ್ಗುರು ಅವರ ದೃಢ ನಿಲುವಾಗಿತ್ತು. ಇದೇ ಅವರ ಅಸಾಧಾರಣ ಶಿಸ್ತು, ನಿಷ್ಠೆ ಮತ್ತು ಸೇವಾಭಾವಕ್ಕೆ ಸಾಕ್ಷಿಯಾಗಿದೆ ಎಂದು ಉಲ್ಲಾಸ್ ಹೇಳಿದ್ದಾರೆ. ಇಂತಹ ಅಚಲ ಸಮರ್ಪಣೆಯೇ ಸದ್ಗುರು ಅವರನ್ನು ಇಂದು ಜಗತ್ತಿನಾದ್ಯಂತ ಪ್ರಸಿದ್ಧರಾದ ಆಧ್ಯಾತ್ಮಿಕ ಗುರುವಾಗಲು ಕಾರಣವಾಗಿದೆ. ಅವರ ಜೀವನ ಪಯಣವು ಇಂದಿಗೂ ಅನೇಕ ಜನರಿಗೆ ಪ್ರೇರಣೆಯಾಗಿಯೇ ಉಳಿದಿದೆ.